ಮೌನದ ಗಮ್ಮತ್ತು

ಮೌನವೆಂಬುದೇ ಹಾಗೆ ಮುರಿಯಲಾರದೇ
ಮನಕ್ಕೆ ಕದವಿಕ್ಕಿ ಕೂತರೆ
ಹಸಿವಿನ ಪರಿವೆಯಿಲ್ಲ
ನಿದಿರೆಯ ಹಂಗಿಲ್ಲ
ಹನಿ ಹನಿಯಲ್ಲೂ ಅದೇ ಗಾಂಭೀರ್ಯ
ನೋಡಲಾಗದ ನೋಡದೇ ಇರಲಾಗದ ಸೌಂದರ್ಯ

ಮೌನವೆಂಬುದೇ ಹಾಗೆ
ಮರೆಯಲಾರದೇ
ನಗುವನ್ನು ಅಣಕಿಸುವ
ಅಣಕನ್ನು ನಿಗಿ ನಿಗಿಯಾಗಿ
ಉರಿಸುವ
ಜ್ವಾಲಾಮುಖಿಯಾಗಿ
ಮನವನ್ನೇ ಕಲುಕುವುದು.

ಮೌನ ಸಮ್ಮತಿಯ ತೋರ್ಪಡಿಕೆಯಲ್ಲ
ಮೌನ ಮಾತಿನ ಚಡಪಡಿಕೆಯಲ್ಲ
ಅದು ತೀರಲಾಗದ ಕಕ್ಕುಲತೆ
ಅದಕ್ಕೆ ತಿಮಿರಿಲ್ಲದ ವ್ಯಾಕುಲತೆ